काठमाडौं,असोज ९ । नेकपा एमालेका महासचिव शंकर पोखरेलले सत्ताबाट बाहिरिनुपर्दा प्रचण्डमा आएको छटपटीले गर्दा राष्ट्रिय राजनीति तनावपूर्ण भएकाे बताएका छन् । धनगढीमा सञ्चारकर्मीहरुसँग कुरा गर्दै पोखरेलले भनेका छन्, सत्ता गुमाएको कुण्ठामा माओवादीले संसद अवरुद्ध गरेको समेत बताए । ‘सरकार गठन भएको १०० दिन नपुग्दै उहाँले संसदमा जुन अभिव्यक्ति दिनुभयो, त्यो पूर्णत असंसदीय र अराजनीतिक थियो’, उनले भने, ‘त्यही अभिव्यक्तिका कारण संसदभित्रै गतिरोध उत्पन्न भयो ।’
माओवादी द्वन्द्वकालमा भएको हिंसाको आलोचना गर्दा हिंसा शब्द असंसदीय हो भनेर माओवादीले संसद रोकेको उनले बताए । तर माओवादी द्वन्द्वकालमा हिंसा मात्र भएन, राष्ट्रमा आतंक सिर्जना गर्ने काम भएको उनले बताए । ‘दिनदहाडै बसमा आगजनी गर्ने, राति घरमा सुतेका एउटै घरमा ११ जनाको हत्या गर्ने काम भयो’, उनले भने, यो हिंसा मात्र होइन, आतंक पनि हो ।
’सत्य निरुपण आयोग गठन गर्ने क्रममा माओवादी स्वयंले यसलाई स्वीकार गरिसकेको एमाले महासचिव पोखरेलले बताए । उनले भने, ‘सत्ता गुमाएको कुण्ठामा हिंसा पनि असंसदीय भयो भनेर संसद रोक्ने काम भयो, त्यसले कानुन निर्माणको महत्वपूर्ण समयमा संसद स्थगित गर्नुपर्ने भयो ।’ यद्यपि माओवादीले तत्कालै आफ्नो कमजोरी स्वीकारेर संसद खोलेको भन्दै उनले धन्यवाद दिए ।
